आकाशमा चम्किलो लस्कर: Starlink उपग्रहको दृश्यले चकित पारे स्थानीयहरूलाई
गएराति करिब पौने ८ बजेतिर आकाशमा देखिएको अनौठो दृश्यले धेरै स्थानीय बासिन्दाहरूलाई अचम्ममा पार्यो। आकाशमा ताराजस्तै चम्किरहेका एकै रेखामा क्रमबद्ध रूपमा अगाडि बढिरहेका बस्तुहरूको लस्कर केही मिनेटसम्म देखिएको थियो, जसपछि त्यो दृश्य आफैं हरायो । धेरैले यसलाई पहिले कहिल्यै नदेखिएको चमत्कारी घटना ठाने भने केहीले अज्ञात उडन्त वस्तु (UFO) को आशंका समेत व्यक्त गरे ।
तर खगोलविद् र अन्तरिक्ष विज्ञानसँग सम्बन्धित विज्ञहरूका अनुसार यो दृश्य एलन मस्कको कम्पनी SpaceX द्वारा सञ्चालित Starlink परियोजनाअन्तर्गत पृथ्वीको कक्षमा पठाइएका इन्टरनेट उपग्रहहरू हुन् ।
Starlink एक महत्त्वाकांक्षी इन्टरनेट सेवा परियोजना हो जसअन्तर्गत सयौं साना उपग्रहहरू पृथ्वीको तल्लो कक्षमा प्रक्षेपण गरिन्छन्। यिनीहरूले विश्वका दुर्गम क्षेत्रहरूमा समेत उच्च गतिको इन्टरनेट सेवा प्रदान गर्ने लक्ष्य राखेका छन्। जब यिनीहरू पृथ्वीको कक्षमा सूर्यको किरण परिरहेको बेला हाम्रा आकाशबाट देखिन्छन्, तब चम्किलो लस्करको रूपमा देखिन्छन् ।
विशेषज्ञहरूका अनुसार, यस्तो दृश्य सामान्यतया सूर्यास्तपछिको समय अर्थात् साँझ ७:३० देखि ८:३० बजेको बीचमा मौसम सफा रहेको अवस्थामा देखिन्छ। उपग्रहहरूको पङ्क्तिबद्ध गति र एकै दिशातर्फको समन्वित यात्रा धेरैको लागि कौतूहल र रोमाञ्चको विषय बन्छ ।
यसरी आकाशमा अचानक देखिने यस्ता दृश्यहरू भविष्यमा अझ प्रायः देखिने सम्भावना रहेको छ, किनकि Starlink लगातार नयाँ उपग्रहहरू अन्तरिक्षमा पठाइरहेको छ ।
यदि तपाईंले पनि आकाशमा यस्ता दृश्य देख्नुभयो भने अचम्म नमान्नुहोस्, त्यो सम्भवतः अन्तरिक्षबाट आइरहेको डिजिटल युगको संकेत हो — Starlink को चम्किलो यात्रा ।
